Семинари и обуки | Дирекција за безбедност на класифицирани информации

Семинари и обуки

Ориентациски курс за ЗБОП

Брисел, 13-17 мај 2013 година

 

Од 13-17 мај 2013 година претставник од Дирекцијата ќе учествува на ориентациски курс за ЗБОП што го спроведува Европскиот колеџ за безбедност и одбрана во Брисел во соработка со австриското Министерство за одбрана и спорт и хрватското Министерство за надворешни работи, во рамките на Програмата за обука за ЗБОП за 2013 година за земјите од Процесот на стабилизација и асоцијација. Оваа обука е во рамките на унапредувањето на капацитетите на Дирекцијата за компатибилност на безбедносните критериуми и стандарди меѓу Република Македонија и Европската унија и се надоврзува на досегашната заемна соработка меѓу Дирекцијата за безбедност на класифицирани информации и австриското Министерство за одбрана и спорт.

Обука во Академијата за судии и јавни обвинители

Скопје, 8 мај 2013 година

 

На 8 мај 2013 година Дирекцијата за безбедност на класифицирани информации во соработка со Академијата за судии и јавни обвинители на Република Македонија ќе одржи предавања за претставниците од судството и од обвинителството, како и од редот на адвокатите од цела Македонија. Предавањата ќе бидат сврзани со ракувањето, чувањето и достапноста на класифицираните информации во текот на секојдневната работа на слушателите.

Меѓународна работилница за правните аспекти за борба против тероризмот

Охрид, 15.04.-19.04.2013 година

 

Во периодот од 15.04.-19.04.2013 година претставници од Дирекцијата за безбедност на класифицирани информации учествуваа на меѓународна работилница што се одржа во Охрид под покровителство на Американската амбасада во Република Македонија на тема „Правните аспекти за борба против тероризмот/мировни операции“. Предавачи на оваа работилница беа експерти од САД. Работилницата беше наменета и на неа зедоа учество повеќе државни органи од безбедносните служби на Република Македонија.

Работилница за сајбер одбрана

Анкара, Турција, 08.04.-19.04.2013 година

 

Во периодот од 08.04 до 19.04 2013 година во заедничка организација на НАТО и на Република Турција, како и на соодветните служби на Грузија и на Канада, на Техничкиот универзитет на Средна Азија во Анкара, Република Турција, беше одржана двонеделна обука за претставници од Република Македонија на тема „Обука за сајбер одбрана на систем/мрежни администратори (Cyber Defence Training Course for System/Network Administrators). Претставниците на Дирекцијата имаа можност на оваа обука детаљно да се запознаат со теоретските и со практичните искуства на организаторите на насловната тема на работилницата. На обуката беше спроведена и вежба сврзана со сајбер напади и одбрана од нив.

TAIEX Студиска посета на Националниот безбедносен авторитет на Унгарија

Будимпешта, 24-26 септември 2012 година

 

Во студиска посета на Националниот безбедносен авторитет на Унгарија, во Будимпешта, периодот 24-26 септември 2012 година престојуваа тројца претставници од Дирекцијата за безбедност на класифицирани информации. Студискиот престој беше организиран со поддршка на TAIEX инструментот на Европската комисија. Акцентот на оваа посета беше ставен на ракувањето и заштитата со класифицираните информации од доменот на индустриската безбедност. Во тој контекст, размената на искуствата на двата национални безбедносни авторитета е од големо значење, како за унапредување на знаењата од доменот на индустриската безбедност така и во зацврстувањето на билатералната соработка меѓу Република Македонија и Унгарија.

TAIEX Студиска посета на Националниот безбедносен авторитет на Сојузна Република Германија

Бон/Берлин, 04-09 jуни 2012 година

 

Тројца претставници од Дирекцијата за безбедност на класифицирани информации од 4 до 9 јуни 2012 година беа во студиска посета на Националниот безбедносен авторитет на Сојузна Република Германија, организирана со поддршка на TAIEX инструментот на Европската комисија.
Целта на посетата беше запознавање со работата на германските институции кои имаат надлежности во заштитата и ракувањето со класифицирани информации, со акцент на информатичката безбедност. Притоа, беа извршени работни посети на Федералната институција за безбедност на информациите, на Министерството за економија и технологија во Бон, како и на Националниот безбедносен авторитет на Сојузна Република Германија во Берлин.

Обуки во доменот на Заедничката безбедносна и одбранбена политика (ЗБОП) на ЕУ

jуни 2012 година

 

Претставници на Дирекцијата за безбедност на класифицирани информации земаат активно учество во обуките што се организираат во доменот на Заедничката безбедносна и одбранбена политика (ЗБОП) на ЕУ. Како резултат на тоа, двајца претставници на Дирекцијата ќе учествуваат на обуката што ја организира Министерството за одбрана во Скопје на 12-13 јуни 2012 година преку TAIEX инструментот на Европската комисија, а еден претставник ќе земе учество на обуката што ќе се одржи во периодот од 18 до 22 јуни 2012 година во Брисел, организирана во рамките на Програмата за обука за ЗБОП за земјите од Процесот на стабилизација и асоцијација (ПСА) за 2012 година.

TAIEX Студиска посета на Националниот безбедносен авторитет на Сојузна Република Германија

jуни 2012 година

 

Во периодот од 4 до 8 јуни 2012 година тројца претставници од Дирекцијата за безбедност на класифицирани информации ќе престојуваат во студиска посета на Националниот безбедносен авторитет на Сојузна Република Германија, организирана со поддршка на TAIEX инструментот на Европската комисија. Целта на посетата е стекнување знаења и размена на искуства во доменот на работата на Националното тело за безбедносна комуникација на комуникациско-информатички системи (NCSA), на Националното тело за акредитација на комуникациско-информатички системи (NAA) и на Националното тело за дистрибуција на криптоклучеви (NDAA), како и размена на искуства во доменот на информатичката безбедност на класифицирани информации.

TAIEX работилница

Скопје, 13-14 март 2012 година

 

На 13-14 март 2012 година во Скопје се одржа работилницата на тема „Критериуми, мерки и стандарди за физичка безбедност на класифицирани информации во државните органи, јавните претпријатија и приватните компании“. Работилницата беше организирана во соработка со Европската комисија од Брисел, во рамките на TAIEX инструментот.

Претседавач на работилницата беше директорот на Дирекцијата за безбедност на класифицирани информации, а презентери беа експерти за физичка безбедност на националните безбедносни авторитети на Кралството Шпанија, на Словачката Република, на Ребулика Унгарија и на Република Кипар: г. Хавиер Лугедо Калдерон, г. Петер Гребач, г-ца Софија Сабо и г. Илиас Хацикумис.

Програма за TAIEX работилницата

Скопје, 13-14 март 2012 година

 

Програмата можете да ја преземете тука

Syndicate content