Билатерални преговори со Националниот безбедносен авторитет на Италијанската Република

20-21 септември 2011, Рим

 

На иницијатива на Дирекцијата за безбедност на класифицирани информации, а по покана на Националниот безбедносен авторитет на Италијанската Република, на 20-21 септември 2011 година во Рим се одржа првата фаза од билатералните преговори за усогласување на текстот на Спогодбата меѓу Владата на Република Македонија и Владата на Италијанската Република за размена и заемна заштита на класифицирани информации. Преговорите коишто резултираа со договорена прва верзија на текстот на спогодбата, се одвиваа во конструктивна атмосфера пришто беа разменети досегашните искуства на двете дирекции во доменот на заштитата на класифицираните информации.

Висока конференција: Безбедносната политика на Европа – дипломатија, одбрана и развој

12-15 септември 2011, Охрид

 

Во периодот од 12 до 15 септември 2011 година во Охрид се одржа конференција под наслов „Висока конференција: Безбедносната политика на Европа – дипломатија, одбрана и развој“. Конференцијата се одржа во рамките на Програмата за обука за ЗБОП за земјите од Процесот на стабилизација и асоцијација за 2011 година, во коорганизација на Дирекцијата за безбедност на класифицирани информации и Европскиот колеџ за безбедност и одбрана (ЕКБО), при што Австрија, како еден од иницијаторите на програмата за обука, беше twinning партнер за овој настан.

Состанок меѓу Република Македонија и Политичкиот и Партнерскиот комитет на НАТО за ПАРП проценката 2011 година

Брисел, 14 јуни 2011 година

 

На 14 јуни 2011 година во Седиштето на НАТО во Брисел се одржа состанокот меѓу Република Македонија и Политичкиот и Партнерскиот комитет на НАТО за ПАРП проценката 2011 година со којшто се заокружува 12-иот циклус од подготовките на Република Македонија за членство во НАТО.

На состанокот, на којшто присуствуваше и директорот на Дирекцијата за безбедност на класифицирани информации, беше оценето дека ПАРП документот е изработен добро и дека дава јасна слика за напредокот на државата. Конечниот писмен извештај за остварениот напредок во подготовките на Република Македонија за членство во НАТО наскоро се очекува и официјално да биде доставен до државата, по што ќе претставува една од основите врз којашто ќе се базираат активностите од 13-иот циклус на подготовки на Република Македонија за членство во Алијансата.

Нов термин за посетата на преговарачкиот тим на САД на Република Македонија

Скопје, 30 мај 2011 година

 

Посетата на тимот на Владата на САД на Република Македонија, којашто беше најавена за периодот од 9 до 13 мај 2011 година, ќе се реализира во периодот од 20 до 24 јуни 2011 година. Во рамките на процесот за билатерални преговори за склучување генерален договор за размена на класифицирани информации во делот на одбраната меѓу Република Македонија и САД, посетата на преговарачкиот тим на САД ќе биде искористена за остварување повеќе работни средби со претставници на надлежните служби во Република Македонија и за посета на компанија што се занимава со наменско производство за потребите на одбраната.

Прва средба на раководителите на националните безбедносни авторитети на земјите од Југоисточна Европа

Софија, 25-27 мај 2011 година

 

По иницијатива на Секретаријатот на Советот за регионална соработка (Regional Cooperation Centre – RCC) на ЕУ и на Државната комисија за безбедност на информации на Република Бугарија, на 26 мај 2011 година во Софија се одржа Првата средба на раководителите на националните безбедносни авторитети на земјите од Југоисточна Европа, на тема „Регионалната соработка на полето на функционирањето на системите за заштита на класифицирани информации – практики и предизвици со коишто се соочуваат земјите од Југоисточна Европа“.

Посета на д-р Јохан Рехл на Република Македонија

Охрид 16-17 мај 2011 година

 

На 16 и 17 маj 2011 година, во посета на Република Македонија престојуваше д-р Јохан Рехл, претставник на Сојузното министерство за одбрана и спорт на Република Австрија. Посетата беше реализирана во насока на подготовките за одржување на првата Висока конференција на земјите членки на ЕУ и на земјите кандидати за членство на Унијата, којашто ќе се одржи во периодот од 12 до 15 септември 2011 година во Охрид, во коорганизација на Дирекцијата за безбедност на класифицирани информации и на Европскиот колеџ за безбедност и одбрана, во рамките на Програмата за обука за ЗБОП за 2011 година.

Посета на Националниот безбедносен авторитет на Република Словенија

Љубљана, 11-12 мај 2011 година

 

На 11 и 12 мај 2011 година во Љубљана, по покана на Националниот безбедносен авторитет (НБА) на Република Словенија, во Љубљана се одржаа билатерални разговори за имплементацијата на Спогодбата меѓу Владата на Република Македонија и Владата на Република Словенија за размена и заемна заштита на класифицирани информации, којашто беше потпишана на 31 март 2010 година во Скопје и влезе во сила на 1 јануари 2011 година.

Билатерални разговори со НБА на Република Словенија за имплементација на спогодбата за размена и заемна заштита на класифицирани

Скопје, 5 мај 2011 година

 

На 11 и 12 мај 2011 година во Љубљана, по покана на Националниот безбедносен авторитет на Република Словенија, ќе се одржат билатерални разговори за имплементацијата на Спогодбата меѓу Владата на Република Македонија и Владата на Република Словенија за размена и заемна заштита на класифицирани информации, којашто беше потпишана на 31 март 2010 година во Скопје и влезе во сила на 1 јануари 2011 година.

На разговорите, на највисоко ниво на националните безбедносни авторитети на двете земји, ќе бидат дискутирани повеќе прашања сврзани со практичната примена на одредбите од билатералната спогодба во меѓусебната соработка на надлежните служби на Република Македонија и на Република Словенија во доменот на заштитата на класифицираните информации и на процедурите за безбедносна проверка на корисниците на класифицирани информации.

Одложена посета на преговарачкиот тим на САД на Република Македонија

Скопје, 4 мај 2011 година

 

Посетата на тимот на Владата на САД на Република Македонија, којашто првично беше најавена за почетокот на мај 2011 година, а потоа поместена за периодот од 9 до 13 мај 2011 година, е одложена по барање на тимот на САД заради нивни причини. Од Амбасадата на САД во Скопје најавија дополнително известување за нов термин за реализација на посетата во рамките на процесот за билатерални преговори за склучување генерален договор за размена на класифицирани информации во делот на одбраната меѓу Република Македонија и САД.

Средба во Генералниот секретаријат на Советот на ЕУ

Брисел, март 2011 година

 

Кон крајот на март 2011 година во Брисел, на покана на раководителите на секторите за информатичка безбедност и за безбедносна комуникација во Генералниот секретаријат на Советот на ЕУ, г-дин Улрих Ван Есен и г-дин Себастијан Леоне, а во присуство на г-дин Стефан Витман, вработен во Секторот за информатичка безбедност, директорот на Дирекцијата за безбедност на класифицирани информации (ДБКИ), оствари средба и разговори сврзани со новите безбедносни правила на ЕУ донесени по Лисабонскиот договор, во однос на билатералната спогодба со ЕУ за размена на класифицирани информации и безбедносните аранжмани за нејзино спроведување.

Syndicate content